ИНСТИТУТ ГОСУДАРСТВА, ПРАВА И ДЕМОКРАТИИ ТУРКМЕНИСТАНА

GARAŞSYZ, HEMIŞELIK BITARAP
TÜRKMENISTANYŇ PREZIDENTI HORMATLY
SERDAR BERDIMUHAMEDOWA

«Bitarap Türkmenistanda döwletliligiň, hukuk ulgamynyň we demokratiýanyň ösüş gadamlary» atly ylmy-amaly maslahata gatnaşyjylaryň

Ý Ü Z L E N M E S I

Siziň Alyhezretleriňiz,
çuňňur hormatlanýan
Türkmenistanyň Prezidenti!

«Bitarap Türkmenistanda döwletliligiň, hukuk ulgamynyň we demokratiýanyň ösüş gadamlary» atly ylmy-amaly maslahatyň öz işine başlamagy mynasybetli iberen mähirli Gutlagyňyz hem-de maslahatyň ýokary derejede guramaçylykly geçirilmegi üçin döreden mümkinçilikleriňiz üçin Size tüýs ýürekden hoşallygymyzy bildirýäris.

Size berk jan saglyk, uzak ömür, ýurdumyzyň durnukly ösüşleri üçin alyp barýan il bähbitli, halkara ähmiýetli işleriňiziň rowaç bolmagyny arzuw edýäris!

Hormatly Prezidentimiz!

Siziň Gutlagyňyzda döwletlilik, kanunyň hökmürowanlygy we milli demokratik ýörelgeleriň döwlet, jemgyýet, şahsyýet gatnaşyklarynyň we raýat jemgyýetiniň kämilligine oňaýly täsiriniň beýan edilmegi, halk häkimiýetiniň asyrlaryň jümmüşinden gözbaş alyp gaýdýan demokratik däpleri bilen häzirki zaman döwlet gurluşynyň sazlaşygy aýdyň şöhlelendirilýär.

Häzirki döwürde demokratik, hukuk we dünýewi Türkmenistan döwleti ösüşli ýollar bilen öňe barýar, durmuş ugra gönükdirilen bazar ykdysadyýeti we raýat jemgyýeti yzygiderli kämilleşýär. Şonuň üçin hem, Türkmenistanyň raýatlary, halkara jemgyýetçiligi Konstitusiýanyň ýörelgeleýin kadalarynyň durmuşa geçirilişine, döwletlilige, milli hukuk ulgamyna, şeýle-de, hemişelik Bitaraplyk hukuk ýagdaýyna esaslanyp, ýurdumyzyň alyp barýan içeri we daşary syýasatyna uly ynam bilen garaýar.

Maslahatda çykyş edenleriň, milli we halkara hukukçylaryň, syýasatçy bilermenleriň belleýşi ýaly, jemgyýetde ylalaşyklylygyň, raýdaşlygyň, işjeňligiň, ykdysadyýetde durnukly ösüşiň üpjün edilmegi esasynda türkmen jemgyýeti sazlaşykly ösýär, Türkmenistanda halk häkimiýetliligi we demokratiýa pugtalanýar.

Ylmy seljermeleriň netijeleriniň görkezişine görä, Konstitusiýa, milli kanunçylyk Türkmenistanyň häzirki zaman gymmatlyklar ulgamynyň, jemgyýetçilik gatnaşyklarynyň hukuk binýadyny üpjün edýär. Munuň özi, adam hukuklaryna we azatlyklaryna hormat goýulmagynda; bazar ykdysadyýetiniň ösüşinde; hukuk döwletiniň däplerine we ýörelgelerine eýermekde; halk häkimiýetiniň milli däpleriniň dabaralanmagynda; halkara hukuk kadalarynyň ileri tutulmagynda öz beýanyny tapýar.

Berkarar döwletiň täze eýýamynyň Galkynyşy döwrüniň umumy kanunalaýyklygy hukuk ylmynyň we tejribäniň hyzmatdaşlygynda, sazlaşygynda aýdyň görünýär. Hukuk ylmy bilen tejribäniň özara baglanyşygynyň berkemegi, kadalaşdyryjy hukuknamalaryň ylmylygynyň özleşdirilmegi hukuk ulanyjylara özüniň oňyn täsirini ýetirýär. Hukugyň üstünlikli amala aşyrylmagy ýurduň ösüşiniň wajyp guraly bolmak bilen, ol ösüşleriň ygtybarlylygyny we durnuklylygyny emele getirýär hem-de durmuş-ykdysady maksatnamalaryň durmuşa geçirilmegine şert döredýär. Türkmenistanyň kanunçylygy döwrüň talaplaryny nazara alyp, adamyň we raýatyň bähbidine yzygiderli kämilleşdirilýär.

Çuňňur hormatlanýan Prezidentimiz!

Siziň parasatly ýolbaşçylygyňyzda döwletiň hukuk esaslaryny pugtalandyrmak, jemgyýetde demokratiýany mundan beýläk-de ösdürmek, syýasy, jemgyýetçilik, ykdysady, ylmy we medeni özgertmeleriň kanunçylyk binýadyny kämilleşdirmek, milli kanunçylygy halkara hukugynyň umumy ykrar edilen kadalaryna laýyk ösdürmek işleri ulgamlaýyn alnyp barylýar.

“Türkmenistanyň adam hukuklary boýunça 2026-2030-njy ýyllar üçin Hereketleriň milli Meýilnamasyny”, “Türkmenistanda gender deňligi boýunça 2026–2030-njy ýyllar üçin Hereketleriň milli meýilnamasyny”, “Türkmenistanda çagalaryň hukuklaryny durmuşa geçirmek boýunça 2023-2028-nji ýyllar üçin hereketleriň milli Meýilnamasyny” tassyklap bermegiňiz bilen, BMG-niň düzümleri we beýleki halkara guramalar bilen bilelikde adam hukuklary boýunça toplumlaýyn işleri durmuşa geçirmäge giň mümkinçilikler döredi.

Şu nukdaýnazardan, adam hukuklarynyň kanuny kepilliklerini we durmuşa geçirilişini wagyz etmegi güýçlendirmek, bu ugurda ylmy seljermeleri geçirmegiň netijeliligini artdyrmak boýunça öňde durýan wezipeler maslahata gatnaşyjylaryň üns merkezinde boldy. Şonuň bilen birlikde, maslahata gatnaşyjylar Bitarap Türkmenistanyň daşary syýasat ugrunyň baş maksatlarynyň halkara guramalary we dünýäniň döwletleri bilen köpugurly, özara bähbitli we netijeli hyzmatdaşlyga gönükdirilendigini aýratyn bellediler.

Siziň başlangyjyňyz bilen, Birleşen Milletler Guramasynyň Baş Assambleýasynyň 80-nji sessiýasynyň dowamynda, 2026-njy ýylyň 20-nji maýynda «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti», 2026-njy ýylyň 24-nji iýulynda «2028-nji ýyl – Halkara hukuk ýyly» atly kararnamalaryň biragyzdan kabul edilmegi, örän ähmiýetli taryhy wakalar boldy. BMG-niň Baş Assambleýasynyň Türkmenistanyň başlangyjy bilen kabul eden 30-dan gowrak kararnamalary ýurdumyzyň halkara hukugynyň ösüşine goşýan mynasyp goşandyny alamatlandyrýar.

Siziň Alyhezretleriňiz,
çuňňur hormatlanýan
Türkmenistanyň Prezidenti

«Bitarap Türkmenistanda döwletliligiň, hukuk ulgamynyň we demokratiýanyň ösüş gadamlary» atly ylmy-amaly maslahata gatnaşyjylara iberen mähirli Gutlagyňyz üçin Size tüýs ýürekden sag bolsun aýdýarys. Siziň janyňyz sag, ömrüňiz uzak, mertebäňiz belent bolsun, il-ýurt bähbitli, umumadamzat ähmiýetli işleriňiz rowaçlyklara beslensin!

Sizi çuňňur hormatlamak bilen,

«Bitarap Türkmenistanda döwletliligiň, hukuk ulgamynyň we demokratiýanyň ösüş gadamlary»
atly ylmy-amaly maslahata gatnaşyjylar.
(Aşgabat şäheri, 2026-njy ýylyň 23-nji oktýabry)